oder uf Bärndütsch: Vo Kafi, Brügge, Türm und Züg
Es isch irgendwenn Aafang Ouguscht.
I sitze i mim eigete (aso gmietete), rotlackierte chliine Bötli.
Es tuckeret gmüetlech vor sech häre, wärend ig meh oder weniger erfougriich probiere, i keni vode Houzplanke am Kanaurand inezfahre. Leider cha mis Boot nid so guet gradusfahre, und ig nidso guet mini Ufmerksamkeit bim Stüüre bhaute – i beobachte dMönsche i de Bötli vor und hinger mir, zieh mi Chopf ii während i unger eire vo vile härzige Brügge dürefahre, betrachte ds Meer a farbig lüchtende Blueme wo dr Kanau sümt, dBöim, wo mit irne usladende Äscht obedrüber ä grüene Baldachin biude, und ... – wi e dumpfe Knau mi liebevou druf ufmerksam macht – bi wider i Rand inedonneret. I lächle dene im Boot vor mir zue, wo sech zu mir umdräie, und zucke unschuudig mitde Schuutere, während i mis eigete Boot wider uf Kurs bringe.
Eigentlech isches aber sehr e gmüetlechi Bootstour gsi – weme mau dr Vorfau uschlammeret, woni mi im Schiuf näbem See verirrt ha und mit mine Kapitänskünst a mini Gränze gstosse bi, wiu dr Wäg emu uf dr zerknitterete Charte i mine Händ sehr viu klarer usgseh het.
Wo bini gsi? Ah ja, es isch e gmüetlechi Bootfahrt gsi, und zwar dür es chliises Örtli names «Giethoorn», woni zwöi Täg verbracht ha zwüsche Amsterdam und mim nächste Stopp, Rotterdam.
I bi nur zwöi Täg in Giethoorn gsi, und di meischti Zyt hani äue im Garte vo mim härzige chliine Hostel verbracht mit Bötli ufem Kanau zueluege, läse und Kafi trinke - mä cha ja nid immer in vougstopfte Städt umerennä.
Rotterdam isch e sehr faszinierende Kontrast zu Amsterdam gsi mit sine modärne Hochhüser und dr ussergwöhnleche Architektur. Bim dür dStadt loufe isch jedes Huus spezieuer gsi aus zvorhärige; eis Bispiu drfür si di berüemte Würfuhüser:
Ou in Rotterdam bini nur churz gsi. Trotzdem hani mehreri tolli Bekanntschafte gmacht: Sigs spontan mitemne angere Hostelgast ga ässe und dStadt erkunde, zäme ga käffele oder ou eifach ine Supermarkt ga iichoufe. Letschteres übrigens mit öperem, wo besser Französisch aus Englisch het chönne, was mir di lang-ersehnti Glägeheit gäh het, mis roschtige Französisch uszpacke, wo aber lut mire nätte (vilech nid ganz ehrleche) Bekanntschaft eigentlech zimlech guet sig.
Hie no es paar meh Fotis us Rotterdam:
Zudem bini ufe Euromast (Ussicht wi links im Biud) - di einti Richtig (ufe) mitem Lift, di angeri (abe) mit Karabiner amne Seil feschtgmacht. Woni obe über zGländer klätteret bi, hani mi scho churz gwunderet, obi eigentlech i mire Freizyt nüt bessers ztue ha, aus in 100 Meter höchi amne Seil umezhange... anschiinend aber nid, wiui ja im letschte Biitrag scho etabliert ha, dasi jiz sehr lang sehr viu Zyt ha, für aui gschide und weniger gschide Ideä umzsetzä wo mir so düre Chopf flattere.
Nachem Abseile bini när nomau ufe zum mi Rucksack ga hole, ha aber müesse feschtsteue, dasi zSchloss, woni mi Rucsack drmit gsicheret ha, nid ufbechume. Mi Code, woni früecher a dem Tag scho problemlos ha brucht gha, het zSchloss nid ufbecho, und o keni Variante drvo - nidmau dHiuf und Schloss-Knack-Tricks vode Aagsteute ufem Turm hei mir chönne häufe. Es bizli speter isch ä Drahtschäri zu mire Rettig cho. Iz hani 1) mi Rucksack wider, weis 2) dass mis Schloss es guets gsi isch, chas aber 3) leider nümm bruche.
Mit de unglückleche Begäbeheite isches leider no chli witergange: Nachdem i nid wi plant e Sitzplatzreservation fürne Nachtzug nach Kopenhagen becho ha, hani müesse für ei Nacht es Hotel in Hamburg bruche. Ufem Weg derthäre isch zersch eine vo mine Züg nach überere Stund wäge technische Problem zrügg i Usgangsbahnhof gfahre, di versprochene Ersatzbusse hei ire Weg zu üs nid würlklech gfunde, und zu auem Übu si ner mini (Kredit)Chartene ou no nümme gange. Us dem Grund hani mis Hotel nid chönne zahle und ä Nacht inere Lobby verbracht - aber immerhin bini när am nächschte Namitag doch no in Copenhagen acho. Dert hani zersch mau 15 Stund gschlafe und mi am nächschte Tag gwunderet, warum mir äch so schwindlig isch, bis mir ufgfaue isch, dasi fasch 24 Stund nüt meh ha gässe gha.
Däne Umständ und dr Erholigszyt woni drvo brucht ha isches ou zverdanke ds de zwöit Biitrag hie einiges später ufeglade wird ausi ursprünglech plant ha - es het nid ghuufe dasi e Grossteil drvo schomau gschribe ha und ner - leider fäuschlecherwiis - drvo bi überzügt gsi, er sig aus Entwuurf gspicheret.
Aber wi ou immer, i bi guet in Kopenhagen aacho und scho glii witer ufem Weg nach Schwedä - für dä hani übrigens sogar dra denkt, mir rächtzytig e Sitzplatzreservation zchoufe, und chlopfe mr immer no ab und zue innerlech stouz uf dSchuutere.
Bis glii:)
Comments