Vo Flåm simer via Oslo und Trondheim nach chli meh aus 24 Stund Reis nach Bodø glangt. Bodø isch ä chlini Stadt im Norde vo Norwegä, nid wit entfernt vo de berüemte Lofoten-Insle.
Dr erscht Aabe isch vo dr obligatorische Supermarkt-Shoppingtour in Aaspruch gnoh worde (mir hei ou di zwöiti Wuche sehr fein g'ässe, sigs Fajitas, Lasagne oder Rüerei-und-Späck Zmorge)
Am nächschte Tag nachemne gmüetlechä Morge heimer när üsi Erkundigstour gstartet, mitemne Spaziergang entlang dr Küste und emne Fluss. Gäge Aabe, womer scho relativ viu gloufe si, simer plötzlech am Fuess vomne Hügu gstande - für dert ufe hätte mr nomau öppe e Stund brucht. E Blick uf d'Uhr und ä Google Suechi speter heimer usegfunde, dass üs ds zimlech genau für ufe Sunneungergang chönnt länge. Und dUssicht uf dä isches ou gsi, wo mi motiviert het, trotz mine müede Bei no dr Hang ufezämpfe, immer es bizli schwankend zwüsche Zytstress und Vorfröid.
Womer schliesslech obe aacho si und di letschte Stigig hei erklomme wo üs dr Blick verdeckt het, si üs vor Stuune zersch mau dMüler offe gstande. Mir hei ä schöni Ussicht über dStadt erwartet gha, vilech dasme zMeer es bizli gseht, eifach öpis schöns am Ändi vomne lange Tag - aber das wo mir gseh hei isch eifach atemberoubend gsi. Vor üs het sech zlüüchtend blaue Meer uftah, wo sech bis a Horizont gstreckt het, und uf aune Site ir Färni hei Bärgchettine id Höchi gragt, blassblau ir Distanz und dunkler je necher dass si gsi si, und dFeusä wo vor üs abe gfaue si hei warm gschimmeret im Aabeliecht.
10 Minute hei mir öppe gha, zum dä Usblick zgniesse, bevor dSunne schliesslech wine chline, goudig glüende Funke im Horizont versunke isch. Zrügglah het si ä Himmu vou sech ständig verwandelnde Farbe, und ä Stadt am Fuess vom Hügu wo nach und nach het afah lüchte im Dunkle.
Dr Rückwäg im Dunkle isch när es bizli schwiriger gsi, wius äbe dunku isch gsi, und wiu mir ä angere Wäg gnoh hei, hei mir ou dFeuse und di sumpfige Steue no nid kennt. Wider uf Strasse aacho, hets üs grad nümm ufne praktische Bus glängt, aso simer dr ganz Wäg zrügg zum Hostel gloufe und üs dert när spät am Aabe no ä warmi Portion Nudle mit Sosse kochet.
Adler und Strudle
Ir Nechi vo Bodo befindet sech dr Saltstraumen - dr stärchscht Gezitestrom vor Wäut (bis zu 40 km/h), wo am Rand Strudu verursacht, wo meh aus 4 Meter töif chöi si. Ganz so starch isches nid gsi, wo mir uf üsere RIB Boat Tour düregfahre si - aber immer no sehr iidrücklech, wi sech eifach plötzlech Wirble im Wasser näbem Boot biude. Zudem hei mir ou no zGlück gha, us nächschter Nechi ä Adler zsgseh.
Ä Insle vou Bärge, Steine, Stränd und Sümpf
DFotis wome unge gseht stamme vo üsem Usflug uf dInsle Landegode. Insgesamt 2 Stund Schiffgfahre simer a dem Tag, und mir heis sehr gnosse, aus einzigi vo de Passagiere dusse im iischaute Wind zstah und uf z'offnige Meer usezluege. (Eventuell heimer ou ganz vore am Bug dramatisch üsi Arme im Wind usbreitet)
Vor Insle säuber heimer niso viu gwüsst, usser dases (im Gägesatz zu viune angere Reiseziu) möglech isch gsi, a eim Tag härezcho und wider zrügg. Si isch när aber sehr beiidruckend gsi mit de raue Feuseflächine, zum Teil mit Moos und Flächte überwachse, wo sech abgwächslet hei mit lüchtend blaue Seeä und sogar chliine wisse Sandstränd. Am Wanderweg hetme aagmerkt, das hie keni Voukswanderige stattfinde, mir hei ne mehrmaus verlore und üs chrüz und quer über Feusä kämpft - einisch heimerne ou sehr bewusst verlah, zum am Seeufer entlang zloufe, was drzue gfüert het, dasmer dürnes Meer us hüfthöchä Gräser gwanderet si. Wüu mr o ke Ahnig gha hei, wome cha häreträte, isches nid überraschend gsi, dasi irgendwenn mits ines Sumpfloch gstande bi. Wasserdichti Schue wäre äbe scho ke schlächti Idee gsi.
Äs Liechtermeer ir Nacht
Eigentlech heimer ja nomau ufe gliich Hügu vom erschte Tag ufe wöue zum dr Sunneufgang aazluege. Nach langer Kontemplation hani befunde, dasi nid weis, obi mits ir Nacht wük usem Bett würd cho - zumau nid mau klar isch gsi, obme trotz Wuuche öpis würd gseh - und mir hei beschlosse, stattdesse nomau am Aabe ufezgah.

Es isch zwar sehr bewöukt gsi, aber ds het üs immerhin ä schimmernde Wasserfau us goudigem Liecht la gseh, wo dürne Spaut ir Wuuchedechi uf zMeer gheit isch; und mir si rächtzytig dobe gsi, zum zgseh, wi dSunne no einisch füreglüslet het.
Dismau simer aber ou mitem Ziu cho, länger dobezblibe, müglechscht bises ganz dunku isch. Darum simir 1) seehr warm iipackt gsi, hei 2) feini Snacks derbi gha und 3) (sehr wichtig!!) Thermosfläsche mit Tee und heisser Schoggi derbi gha. I ha auso mini Kamera mitsamt Stativ ufgsteut und mir heis üs gmüetlech gmacht, üsi i üsi Chleider kuschlet und eifach Zyt gha zum lang mitenang redä.
Während dem heimer dürfe beobachte, wie sech dStadt langsam ines Meer us wiisse und goudige Funke verwandlet het, wo nach und nach im Schwarz und Dunkublau ufglüchtet hei.

...und da ischer wäg gsi...
...üse Bus. Mir si a üsem letschte voue Tag ä Stund lang drin gsässe und hei dank Google-Maps gmeint, bir Fähri müesstemer de usstige und nach dr Überfahrt ine angere Bus iistige. Während dr Schiffahrt het üs dämmeret, dases vilech eifach wider dr gliich Bus isch - ds het ou gstumme, nur daser üs ner leider vor Fähri und drvo gfahre isch, bevor mr wider hei chönne iistige.
Ä angere Bus i die richtig gits nümme, aso simer eifach dr Strass entlanggloufe. Passend drzue hets när ou no afah Rägne, und dStimmig isch es bizli kippt gsi.
Nachdemi dHoffnig scho fasch ufgäh ha gha, het üs nachere Haubstund doch no es Outo mitgnoh - mit Passagiere, wo grad dFähri i di angeri Richtig hei verpasst gha und darum wider zrüggfahre si. Si hei üs direkt bis zu dem chline Örtli bracht, wo mir hei härewöue. Dert isch zwar leider fasch aues zue gsi, und dWäut het zimlech chaut und regnerisch gwürkt - und trotzdem hets ä gwüsse Charme gha, ds türkise Wasser und di wiegende Fäuder, di rotgstrichene Hüsli mit de Grasdächer vorem graublaue Himmu.
Di ganzi Gschicht vo däne zwöi Wuche het leider chli es trurigs Ändi gnoh, und zwar das, ds mi Fründ am Schluss wider zrügg id Schwiz gfloge isch (gfüut zmits ir Nacht, so dsmir nidmau richtig hei chönne usschlafe, ja nei) - aber es het mir viu bedütet, zReise mit öperem chönne zteile. Usserdäm hei no es paar witeri Reiseziu uf mi gwartet, woni mi sehr druf gfröit ha - Fortsetzung folgt ;)
Comments