Mini Reis ligt zwar iz scho öppe 3 Mönet zrügg, aber i ha trotzdem mau eifach no wöue über di ganzi Zyt zrüggluege. Ds wär früecher plant gsi, machi aber eifach iz.
Weni a di 2ehaub Mönet zrüggdänke, lüchte aus erschts ganz viu Biuder uf vor mine innere Ouge, wi Polaroids, wo im Schloss vo mine Erinnerige dWänd verziere. Biuder vo Bärggipfle und ufgwüutem Meer, vo Strasse wo vou Mönsche wusle, vo grüene Liechter, wo am Nachthimmu tanze, vo Hostelchuchine, wo vougstopft si mit Mönsche, Ässe, Gschirr, Lache und Gschichte - und Biuder vo so vilem meh. Und weni iitouche i di Biuder, de wärde si i mim Chopf zu chline Fiumli, wo mir Gschichte vo dere Zyt verzeue. Und ds erfüut mi de ganz schnäu mit Dankbarkeit - Dankbarkeit, dasi au di Erfahrige ha dörfe sammle, Erlebnis ha dörfe ha.
Es isch zimlech viles passiert:
I bi in 4 verschidene Länder gsi, ha in 10 verschidene Hostels gschlafe, ide Kanäu vo Copenhagen badet, ide Fjorde vo Norwege Kayak gfahre, amne See in Tromso dNordliechter gseh, i dutzende Kafis ä Latte Macchiato trunke, unzähligi Fotis gmacht.
I bi ou chrank gsi, ha unfreiwiuig ire Hotellobby müesse übernachte, ha mini Kamera imne See versenkt und dadurch zerstört, bi plötzlech ohni funktionierendi Charte und Bargäud daagstande, und ha zum Bispiu mau zmits imne Supermarket afah gränne, wiui so müed bi gsi, vom tagtäglech soviu Iidrück ufznäh und Entscheidige zträffe, dass zUswähle vo Instant Noodles ner plötzlech eifach zviu isch gsi.
De letscht Paragraf isch nid gliich toll, zum sech dra erinnere, aber er het derzueghört, het mi Sache glehrt, und isch es Zügnis drvo, dases immer beides git - zschöne und zweniger schöne. Und dases dErlebnis und Erfahrige wert si, o wenns oder grad wüus mängisch schwirig isch.
und darum fröji mi oscho, darfi de im Früelig wider ga Reise;) chline Spoiler: Dismau geits nümm i Norde, sondern i Oste... :)
und hie isch no e Sammlig vo mine Lieblingsfotis:
disclaimer: dNordliechterfotis si vo Lüt, woni ungerwegs troffe ha, und nid vo mir, wiu zu dem zytpunkt mini Kamera scho ertrunke gsi isch ;)
Comentários