Hie bini iz

Ds Fougende isch ä Poetry Slam woni im 2021 amne Wiehnachtsgottesdienst ha vortrage. I has ufem Herz gha, dä eifach nomau zteile - und weni ne dürelise, spricht er mir immer no us dr Seelä, i aune schwirige und schöne Momente.

Dr Text isch dGschicht vo mir, wieni mit auem, wo grad mis Härz bewegt, eifach zu Gott chume, ihm aues, aues härelegä - und i dem inne darf Heilig finde bi dem Gott, wo mi gseht, kennt, versteit und sis gliebte Chind nennt.

(i dem Gottesdienst letscht Jahr isch nächer zLied "Adore" vom Chris Tomlin gsunge worde - ds het zumne Teil mi Poetry Slam inspririert und drückt nomau ufne angeri Art ds us, woni wott säge: https://www.youtube.com/watch?v=5LQCz7y5Ht0 )

Hie bini iz, ga uf mini Chnöi

Und fraage mi was Mönsche wi ig überhoupt chöi

Was si chöi bringe, chöi mache, wo gnue für di isch

Du wo dr Maler vom Stärnehimmu bisch

Müed ribi mini Ouge,

Blinzle is Liecht wo dr Bode mit Muschter bedeckt

E nöji Idee i mir weckt

Es Notizbuech, es Raschle, e witeri Site

Mini Gedanke in Buechstabe sortiert und iiquartiert, Plän über Plän über...Aber für wän?

Und immer wider sis mini Händ

Wo wei öpis mache

Sache erschaffe

Öpis schribe wo dis Herz, Gott, bewegt

Öpis male wo zFundament zum Stuune legt

Wort finde wo dSeele heile

Das woni ha mit mim Nächschte teile

Hoffe, dases mr glingt

Dases öpis bringt

Öpis zverändere, das wünschi mir

Damit du gsehsch wiviu mir ligt a dir

Dasi wi du wott Himmu uf Ärde bringe

Vo dire Liebi singe

Und doch fraagi mi

Hie, uf mine Chnöi, dr Stift fescht mit de Finger umschlosse

Wieni mit mine Händ es Loch cha stopfe

Wo doch nur immer grösser wird

Löcher i de Härze vode Mönsche

Und es grosses Loch i mim

Es Loch, e Riss dür mi düre wo seit

Wenn isch gnue?

Wenn isch Rueh?

Wenn hani gnue gmacht zum bewiise

Dasi di liebe, mit dem wonie tue

Feritggsteut, das gmacht wo zeut, mini Hiigab bewise und mit mine Tate uf Gott verwise

I sammle Sache und Gedanke und Lächle und Erinnerige

Wo mir i ihrer Gsamheit söue säge

Dasi mit mire Iisteuig bi richtig gläge

Dass du Gott, wenn du luegsch, jiz stouz uf mi bisch

Aber Gott, wenn du luegsch, wo luegsch du hi?

Woni gester bi gsi oder morn wirde si?

Luegsch uf mini Händ, wo so verchrampft dir zrichtige wei gäh?

Und weni dir säge - mis Härz, es isch immer nonid vou - nur vou mit Stouz und Sehnsucht und Angscht und Wunde

Chlii und verletzlech und gschunde

Gsehsch ds Herz dür die Wänd wo mini Händ drumume boue?

Zum verstecke was da aues no drhinger steit... abverheit... is dunkle gheit... dunkli Sache zu mir seit....

I luege usem Fenschter, wo d'Aabedämmerig dKonture weicher macht

Und ds rötleche Liecht dr Schnee zum Schimmere het bracht

Es lisligs Zie i mir, wie es Flüschtere vo dir

Öpis i mir faht afa toue und i la mi Stift a Bode roue

Tue mis Notizbuech zue

Was, wenn du ds wotsch, wo nur ig dir cha bringe

Ds wo du gmacht hesch und kennsch wi niemer süsch

Wo du aachlopfsch Tag und Nacht

Du wo wenn nötig ou vor zuenige Türe wacht

Vor dr Türe vo mim Herz

Wo aui Wäge suecht wos gitt zum dir öpis gäh, usser dWänd um sich säuber wägznäh

Wo luegt uf dr ganze Wäut und überau

Nach Gschänk für ds Chindli im Stau

Ir Chrippe vou Stroh

Usem himmu bisch cho

Zum üs dis herz härezstreckä

Chli Wermi ire iischaute Wäut ufzweckä

Und ig?

I häbe mini Händ zum Himu uf

Und lege zögerlech mis Härz obedruf

Das isch ds woni dir hüt möcht schänke

Zerbrächlech, so eifach zum verletze

Es Härz woni ständig umehetzä

Zum so wärde dases dir gfaut

Aus obs e Wettberwerb wär

Weni mit mir säuber ringe, Gfüu erzwinge, we mir di schöne Gebet misslinge

Wartisch du

Uf di momente wo mis Gebet mim Herz entspricht

DMur zerbricht

Aues i mir offe i dire Sicht

Und i dem ine muesi nüt tue

Gisch du mir Rueh

Du wo dStärne kreiersch und zeusch und bim Name nennsch

Verschlossnigi Türe isch öpis wo du so guet kennsch

Aues isch zueblibe wo du uf dWäut bisch cho

Und niemer het dis Chlopfe vernoh

Aber es isch dir egau gsi

Du bisch zmits dri, I die Orte wo niemer het gluegt und niemer hät dänkt

Bi üs zsi het dir glängt

Ou i mues so oft zuegäh dasi gar nid uf di luege

Und darum bischs ner immer wider du wo mi chunnt cho sueche

Womi findet

Und nach mim Härz fragt

Langsam sinkt dr Schleier vor Dunkuheit

Wo e graublaui Dechi uf d'Hügle leit

Aber mis Herz gseht nur di

Wott necher zu dir hii

Dert wo mini Lascht abgheit, uf dir abgleit

Isch plötzlech so viu dankbarkeit

Hie bini iz, uf mine Chnöi

Und bäte di aa

La mi eifach la gaa

Dür dini Liebi bini daa

Und dür dini Liebi fahni aa

Zlehrä, es Stück drvo zu dir zrügg ztrage

Mit mim Herz e Schritt i dini Richtig zwaage

I wirde stiu, wiu Wort hinger Ehrfurcht nur no es Flüschtere si

Wo ou immer dasi gester bi gsi oder morn scho bi

Möchti säge, i liebe di

I tue mini Ouge zue

Bi mit dir elei

Das hie isch gnue.

Joanna, 19.12.21

i wünsche öich vo Härze gsägneti Wiehnachtstäg