top of page

Chauti Nächt und heissi Schoggi

Aktualisiert: 12. Mai 2023

Di erschti Nacht woni Nordliechter gseh ha, si si zimlech schwach gsi - meh grau aus grüen, und ganz fiin sichtbar, chum vo de Wuuche z'ungerscheide. So das weme gnue lang i Himu gluegt het, me plötzlech überau Liechter vermuetet het, wo gar keni gsi si, oder wo plötzlech dr Mond isch fürecho zwüsche dä Wuuche.

Ä angeri Nacht isch mr iz no läbhaft in Erinnerig. Es isch scho zimlech spät gsi, womer ufbroche si, und zwar wider zu dem See, wo mini Kamera zum Opfer gfaue isch. Ir Zwüschezyt hani ouno e starchi Vercheutig verwütscht, und bi mi ersch langsam wider am erhole gsi. Trotzdem bini mit - iipackt i aues, woni irgendwo gfunde ha, mehreri paar Socke und Hose, dicki Pullis, Chappe, Schau, Händsche. Ds heisst zwar, dsme gnadelos heiss het gha wärendem zum See marschiere - drfür ischs när aber lenger gange, bisme het afa frierä.

Ungerwägs hani grad no e philosophischi Diskussion mitemne oustralische Hostel-Gascht aagfange, wo mitem Velo dür Norwege greist isch. (Mä begegnet ungerwegs immer sehr viu spannendi Lüt, gwüssi si mitem Zug ungerwegs, angeri mitem Velo, no angeri zFuess, gwüsi dürquere es Land, angeri ä ganze Kontinent...) mir si fasch abglänkt gsi vo üsem Gspräch, wo ufzmau es Stuune dür di ganzi Gruppe gange isch.



Di blasse grüene Schimmer ober üs hei sech i lüchtendi Liechter verwandlet, wo vorem nachtblaue Himmu tanzet hei, wi s bewegts Biud ufere dunkle Liinwand. I ha nid erwartet gha, dass si sech so schnäu bewege, Forme verwandle, grösser und chliner wärde, wi es grüen lüchtends Füür ir Finsternis. Zum grüen het sech irgendwenn a de Ränder no es Pink inegmischt.





Dä Liechter am Nachefahre


Zwüschdüre hets ou ä Nacht gä womer mitem Hostel-Van losgfahre si, meischtens aui Sitze voupackt, zum ane Ort fahre, wome dLiechter besser gseht. Mängisch heimer zwar keni Liechter gseh, drfür aber ä Himmu übersäit mit Stärne, während mr üs i Schlafsäck anenang kuschlet und Gschichte verzeut hei.

Und z'einte odr angere mau hei mr mehreri Thermosfläsche mit heisser Schoggi, dHeufti vo de Gläser und Tasse usem Hostel, und es paar Packige Güetzi mitgnoh, und heis ner so gmüetlech gha, dases fasch ke Roue gspiut het, wenn dWuuchedechi när nie würklech uftah het.




üses chline Hostel


I ha während mine 3ehaub Wuchene in Tromsø ja im Hostel ir Stadt gschaffet - und während Bette mache und WC putze iz nid mega spannend isch gsi, isches doch interessant, mau hinger dKulisse zgseh imne Hostel; vorher bini ja immer nur Gascht gsi. ZHostel isch es zimlech chlises, und sehr viu Sache si vo Hand gmacht: Irgendöper beschliesst, dases ja mau gar nid geit, wi weni Platz mir ir Chuchi hei, und bout churzerhand es nöis Regau zum a d'Wand schrube. I ha leider keni usgeprägte Handwerkskünscht, hami aber paar mau probiert nützlech zmache, indem i bim Striiche vo de Bretter ghuufe ha - und ha ou prompt jedes mau Farb uf mini Chleider becho (und ou nie drus glehrt, dasi vilech auti Sache sött aalege, wiui jedes mau dr Iidruck gha ha, i wüssi ja jiz, wini cha druf luege, dasi mi nid bekleckere. Spoiler: Nei, i has nid gwüsst und ou nid gschafft;) )



Kafi und Büecher


Weni nid grad gschaffet oder Nordliechter aagluet ha, bini entweder chrank im Bett gläge (ds het leider ä ganzi Wuuche in Aaspruch gnoh und wük nid wöue wäggah), odr aber i bi im Städtli umegschlenderet, ha glädelet, Büecher aagluegt, woni sowieso ke Platz hätt gha zum choufe, odr mini Zyt in Kafis verbracht. Eis Kafi im bsundere isch zu mim chliine Lieblingsörtli worde: Es het dr feinscht Latté Macchiato und Chai Latté gha, ganz viu Pflanze, warmi Lampe und Liechtli, verschideni Sofas, Teppiche, Tische und Stüu, e schuefreie Zone, und isch eifach insgesamt sehr heimelig gsi. I somne Kafi zsitze, es warms Getränk zschlürfe, dusse dLüt am beobachte und gliichzytig dinne am Schribe si, ds isch eifach wundertoll.


Tschüss und bis glii:)

Joanna

19 Ansichten0 Kommentare

Aktuelle Beiträge

Alle ansehen

Comments


bottom of page