Heii! :) Aus auererschts, wi im letschte Biitrag versproche, hie ä chlini Sammlig vo Fotis usem Zugfenster in Norwege (mit mire Handykamera dür teilwiis nid so suberi Zugfenster, aber es het wases het) :
Vo Stockholm bini mitem Zug nach Oslo gfahre. Ab dert isch ner ou mi Fründ mit mir cho reisä, und nachere Nacht imne Hostel in Oslo simer nach Flam gfahre, es chlises härzigs Örtli imne Tau umgäh vo Bärge und emne Fjord.
Ou üses Hostel chame guet aus chli und härzig bezeichne, es het us mehrerne einzelne Hüsli bestande, jedes es paar Zimmer und ei chlini Chuchi - die isch, wi mir gli erfahre hei, sehr vougstopft gsi wenn sibe Lüt gliichzytig hei wöue choche und ässe ufemne Ruum vo gfüute 5 Quadratmeter und emne Tisch mit nur 3 Stüu.
Mir hei üs trotzdem nid dervo la abhaute, unger angerem mehrmaus Crêpes zmache - warm, goudig und knusprig, mit ganz viu Nutella druf :)))
Wime vilech ufde Fotis gseht, hei üsi erschte Versüech ä nid 'lügnendi Ähnlechkeit mit Haubmönd gha - fein gsi sisi trotzdem, und ds zwöite mau si si de ou wunderschön rund worde.
Ztolle dra, ds üses chline Hostel äbe so chli isch gsi, isch dGmeinschaft mit de angere Gäscht gsi, wo sech schnäu und unzwunge entwicklet hei. Am Aabe vo üsem Aareisetag zum Bispiu heimer no lang mit fasch üsem ganze Hostelzimmer ir Chuchi Gspräch über Gott und die Welt gfüert und über üsi Erlebnis ustuuscht, und amne angere Aabe hets spontan dusse amne Tisch ä Kreativ-Session gä, womer gmalet, zeichnet und zäme gredet hei.
Wi scho erwähnt ligt Flam am Ufer vomne Fjord - am Aurlandfjord. Zum dä erkunde heimer ä Schiffahrt buechet, wo zwar iischaut und windig gsi isch, aber o eifach wunderschöni Ussicht ermüglechet het uf Bärghäng, Wasserfäu und Dörfli mit rot, wiiss und blau gstrichene Houzhüsli.
wo's üs när irgendwenn zchaut worde isch dusse zstah, simer üs dinne ga ufwärme - und für das hani natürlech ä heissi Schoggi brucht ;)
Des weiteren si mir no ga Kayak fahre. Näbe tolle fotis hets uf däre Tour ou Gschichte über versunkeni Schiff und Wikingergräber gä, und mir hei erfahre, dass dr Fjord töifer isch aus dr auerhöchscht Bärg wo näbedra steit. Dr Aurlandfjord isch ä Näbearm vom Sognefjord, und dä isch teilwiis über 1.3 Kilometer töif.
Zudem si üs zwöi müglechi Erkärige für dEntstehig vom Fj0rd präsentiert worde: Nr 1) isches dür di letschti Iiszyt passiert, oder aber Nr2) het ä Troll ä angere Troll dert düre gschleipft und daderbi näbebi ä kilometertöife Grabe hingerlah.
Mir si ä ganzi Wuche in Flam gsi - ds si 6 Täg meh, aus di meischte Reisende dert im Durchschnitt verbringe. Es het üs aber ou eifach Zyt gäh, zums entspannt näh, mehreri Wanderwäge uszprobiere, gmüetlechi Aabige zverbringe und ou mau ganz entspannt usszschlafe.
Hie übrigens no es paar Biuder vo äbe dene Wanderige:
Comments