top of page

350 Kilometer überem Polarkreis

Aktualisiert: 12. Mai 2023



Es paar Schnappschüss

vo dä erschte Täg:)



Sit Mitti September bini jiz in Tromsø, äre Stadt 350 kilometer überem nördlechä Polarkreis. I bi hie imne chliine Hostel wo gratis Volunteers beherbärgt im Ustuusch für 2-3 Stund Arbeit pro Tag - Bettä bezieh, Putze, Reception und was grad so aasteit.

Mi erscht Tag isch scho es bizli turbulent gsi, zersch bini aber eifach mau aacho und ha grad es Spieguei und Toast serviert becho vo öperem wo am choche isch gsi. Bevor mr zHostel und wases aues zputze git isch erklärt worde, bini mit emne andere Volunteer (zganze Hostel wird praktisch vode Volunteers betribe, dr Chef isch zimlech säute da) mitem Hostel-eigete Hund ga spaziere. Darfi vorsteue: Dr Burger. Ja, er heisst würklech Burger:) und aui Gäscht hei sehr viu Fröid a ihm.

Am Aabe drufabe isch plötzlech dNachricht cho, es würdi hie izde grad ä nöje Chüuschrank fürs Hostel gliferet, mir söue dä bitte in Empfang nä. Dr Chüuschrank isch im Volunteer-Room glandet, und es hei aui so fescht fröid dran gha (chönnt vilech am chronisch überfüute Chüuschrank ir Chuchi lige) dass zWhatsapp-Profiubiud vo eire Kollegin sit denn es Foti vo ihre isch, wi si glücklech und mit beidne Duume ufe im nöie Chüuschrank dinn sitzt.


Am 10ni am Aabe simer heimer üs när ufe Wäg gmacht, zum Nordliechter ga sueche - öpis, wo hie fasch jede Aabe passiert. Amne See am Stadtrand heimers üs schliesslech gmüetlech gmacht, üs i aui Chleider und Schlafsäck iigwicklet, und gwartet. Und ig? Ig bi a Bode knöilet, ha vouer Vorfröid mini Kamera füregnoh und mis Stativ afah ufboue, dadrfür churz mini Kameratäsche inklusive Kamera näbe mir a Bode gleit, und ir Dunkuheit nid gseh, dass dr Bode dert liecht abfauend isch. Im nöchschte Moment het dKamera a Fahrt ufgnoh, isch zUfer abe grouet und churz drufabe im See glandet. I ha se zwar wider chönne usefische, repariert wärde cha si aber wenn überhoupt ersch, weni se nöime iischicke.

So isch mini erscht Nacht leider wortwörtlech es bizli is Wasser gheit. (und darum si dFotis i dem Biitrag ou entweder Handyfotis odr Biuder woni vo angerne becho ha)



Tromsø isch zwar nid ä sehr grossi, aber ä läbhafti Stadt:

uf dr Houptpassage dürs Stadtzentrum, wo sech di meischte Läde und vili Kafis befinde, si immer Lüt ungerwegs, und i ha iz scho zwöimau dert ä Märit bsuecht, wo zumne bsundere Aalass si Ständ ufgsteut worde.

A dene Täg isches aube eifach zouberhaft, zum dürezloufe, di lachende und redende Mönsche zbeobachte, aui Düft wahrznäh...

es git Waffle und Crêpes, heissi Schoggi, ganz viu Ässe zum gratis probierä, Spili, Ständ mit Liechterchettine und söligi mit Musig.Und das ganze umrahmt vom Stadtzentrum vo Tromsø, wo typisch skandinavischi Houzhüser ä iiladende Hingergrund biude.



Ä chliini Schiffahrt


...ufemne aute, aber mittlerwile umboute Fischerboot. Tromsø ligt grössteteils ufere Insle, darum gits viu Wasser uf beidnä Site wo sech aabietä für Bootstoure.


A dem Tag woni gange bi hets chli grägnet und es isch u chaut und windig gsi. Ds hani am Aafang schaad gfunde, aber sehr gnosse sobaudi mi druf iiglah ha: Di iisigi Luft im Gsicht, dr dunkugrau Himmu, di ufgwüuti Wasseroberflächi und dr Nisuräge hei z'ganze irgendwie zure sehr "ächte" Erfahrig gmacht, mä het dUmgebig nid nur gseh, sondern ou gspürt, und dr heiss Tee isch umso schöner gsi.




Goudigi Blätter und ä lüchtend blauä See


Eini vo dä Usflüg woni gmacht ha isch ä Wanderig ufne Hügu näbe Tromsø gsi. Vo dert gseht mä uf di ganzi Stadt abe, und wit dr hinger Bärge, wo sech am Horizont anenangreihe, und di ganzi Landschaft isch dürzoge vo warme Herbstfarbtön. Goudigi und orangi Bletter kontrastiere mit tiefblauem Wasser und bewöuktem Himmu, dr Bode isch gspernklet vo gäube Pünkt. Und ig bi vou i mim Element, wiu Herbst mini absoluti Lieblingsjahreszyt isch - ou wenn dTemperature hie mängisch meh gäge Winter neigä.




Nachdem mir bis zum Fuess vom Hüge glofe si, hei üs 1200 Stägetritte erwartet. A däm hei zwar mini Chnöi nid wük Fröid gha, aber immerhin isch obe när das üsi Ussicht gsi:




Dr nächscht Trip isch zude Lyngen Alps gsi: 2 Stund lang Outo und Fähri fahre und när über ä steinigi, spärlech bewachseni Äbeni wandere, immer mit Blick uf dBärge.



Obwous chli aasträngend gsi isch zum loufe, hani's rächt ä kuuli Landschaft gfunde mitem Kontrast zwüsche de graue steine und Bärge und dä lüchtend orange Böim, wo wi chlini Farbtupfer oder Flämmli uf dr Äbeni si verteilt gsi.


und ds isch dr See gsi wo sech ner plötzlech vor üs uftah het hinger dr letschte Feusäasammlig: Dr Blavatnet Lake. In ächt no meh lüchtend blau aus ufem Biud, so dasme chuum cha gloube, dases eifach Wasser isch, umgäh vo dunkle Bärge, wo i Himu raage, und orange Böim.






Meh us Tromsø verzeui de im nächschte Biitrag:) bis glii!












37 Ansichten0 Kommentare

Aktuelle Beiträge

Alle ansehen

Comments


bottom of page