Hey! I starte grad es Zwüschejahr woni mi scho uu lang druf gfröit ha. I däre Zyt möchti zum Bispiu viu reise und uf verschidenschti Arte kreativ si. Wiu verschideni Lüt mi gfragt hei obi de nöime aube ufelade wasi so mache, weni am reise bi, hani denkt i richte mr de Blog hie ii.
Zuesätzlech wirds aber ou e Ort sii, woni kreativi Sache wott teile - sigs Fotografiere, Schribe, Dichte odr Fiume, au die Sache mache mir mega Fröid und berüere mi immer wider vo nöiem, und i würd u gärn es bizli vo dem witergäh a aui wo sech drfür interessiere.
I ha mi Blog "Mirari" gnennt. Mirari isch latiinisch und bedütet uf dütsch Stuune. Und ds isch genau ds woni immer meh möcht mache - Stuune über ds Gschänk, wo ds Läbe isch, über di chliine und di grosse Sache, über dNatur und über Gott, wo dr Schöpfer vo auem isch.
Weni spät am Aabe dr Stärnehimu aaluege, wenn nachemne Sturm Liecht dür dWuuche bricht, weni ä Fründin umarme oder warmi Sunnestrahle nachere chaute Nacht gspüre, de chani nid angers, aus zstuune, und ds macht mi dankbar und füut mis Härz.
Du bisch härzlech iiglade zum die Blogbiiträg läse wo di aaspreche und interessiere und es paar Stückli us mim Läbe mitzbecho.
Bis gsägnet und bis glii,
Joanna
Comments