top of page

ä gmüetlechi Wuche in Stockholm

Aktualisiert: 12. Mai 2023

D'Zugfahrt vo Kopenhagen nach Stockholm isch scho mis erschtä Highlight vom nöie Reiseabschnitt gsi - zwar lang, aber drfür dür schiinbar ändlosi Wäuder wo sech vo de Gleis bis zum Horizont erstreckä, immer mau wider ungerbroche vo schimmernde Seeä. Womer scho fasch si aacho, isch dSunne grad am ungergah gsi, und ds isch ganz eifach atemberoubend gsi. Es het mi sogar zu dem chliine, zuegänigerwiis rächt kitschige Gedichtli inspiriert:


fields and forest bathed in golden glow

lakes ablaze with evening light

warm colours soak both land and sky

and slowly seeps through the clouds the night


my train a boat in the sea of leaves

waves of gold carry us towards a town

whose outlines grow out of darkening colours

the dwindling light it’s warming gown


In Stockholm säuber hani mi när uf Aahib wougfüut. Zum Teil isch ds vilech gsi wiui vo dere Stadt weniger ghört ha aus zum Bispiu vo Amsterdam und Kopenhagen, darum o weniger Erwartige ha gha und när di ganzi Zyt chli gmüetlecher ha chönne aagah. Dasi weniger vo Stockholm gwüsst ha, sött aber nid heisse, dases nid e wunderschöni Stadt isch - wiu ds isches würklech! DAutstadt mit Hüserreihe in warme Farbtön und chline Kafis wo ihres "Fika" aaprise (Fika isch so öpis wi ä usdehnti Kafipouse, inklusive feini Gebäck, zum mit Fründe, Familie odr Kollegä Gmeinschaft gniesse - es Konzept womir sehr gfaut ;) ), ds stadtshus (Raathus), odr di unzählige Inseli um dStadt ume.


Eim vo däne Inseli hani sogar persönlech ä Bsuech abgstattet: Sandön, mitem Örtli Sandhamn, ganz wit usse im Oschte vo Stockholm. Mi Schlafsaau im Hostel het Sandhamn gheisse, und da hani gfunde muesi dert eigentlech ou no häre - es si ja nur zwöi Stund Schiffahrt häre und zrügg. Di Schiffahrt füehrt aber chrüz und quer a ganz viune Insle verbi, und hani sehr gnosse, scho bevor Sandhamn mit sine hörzige rot gstrichene Hüsli undem Hafe uftoucht isch. DSunneungergangbiuder am Strand si ou uf däre Insle entstande - si isch chliner gsi aus erwartet, aber ä chlini Uszyt us dr Stadt het mr gloub gar nid schlecht tah, und i ha viu Zyt mit Male und Läse verbracht (uuund mir ouno es feins Iiskafi gfunde; immerhin es Kafi hets gha :D )


Chline Spoiler übrigens: Di schöne Zugfahrte hei mit dr Fahrt nach Stockholm ersch ire Aafang gnoh. I bi grad in Norwege, bi izde wider gäg di 24 Stund mitem Zug ungerwägs und finde ds grad gar nid so schlimm. Aber meh drzue de speter;)


Für iz ä liebe Gruess, bis glii, und hie si no dFotis vo Stockholm:)



35 Ansichten0 Kommentare

Aktuelle Beiträge

Alle ansehen

Comentários


bottom of page